அமைச்சர்கள், துணை அமைச்சர்கள் பயன்படுத்தி வரும் புரோட்டோன் பெர்டானாவின் மாதாந்திர தவணைக் கட்டணத்தை காட்டிலும் டொயோட்டா வெல்ஃபயர் காரின் மாதாந்திர கட்டணம் 2 வெள்ளி 80 காசு குறைவாக இருப்பதால் அதையே அதிகாரப்பூர்வ வாகனமாக பயன்படுத்த அரசாங்கம் முடிவெடுத்திருப்பதாக நிதியமைச்சு ஓர் அறிக்கையில் கூறியிருப்பது பெரும் சர்ச்சையை ஏற்படுத்தி இருக்கிறது. அரசாங்கத்தின் இந்த முடிவை பலர் விமர்சித்து வருவதோடு ‘அறிவுக்கு எட்டாத முடிவு’ எனவும் விமர்சிக்கின்றனர். புரோட்டோன் பெர்டானா 2.4 பிரிமியம் காருக்கு மாதத் தவணையாக ஒரு மாதத்திற்கு வெ.4,854.41 செலுத்தப்பட்டு வருகின்ற நிலையில் டொயோட்டா வெல்ஃபர் 2.5க்கு மாதத் தவணையாக ஒரு மாதத்திற்கு வெ.4,851.61 செலுத்தப்படுவதால் மாதத்திற்கு 2 வெள்ளி 80 காசு சிக்கனப்படுத்த முடியும் என நிதியமைச்சர் டத்தோஶ்ரீ தெங்கு ஸஃப்ரூல் கூறியுள்ளார். மாதத் தவணையை சிக்கனப்படுத்துவதாக கூறி அரசின் அதிகாரப்பூர்வ வாகனமாக டொயோட்டா வெல்ஃபயர் பயன்படுத்தப்பட்டால் அதன் சாலை வரி புதுப்பிற்கு வருடத்திற்கு வெ.5,000.00 செலவிட நேரிடும் என்பதை நிதியமைச்சு உணரவில்லை என்று மலேசிய வாடகைக் கார் சங்கத்தின் தலைவர் பஃரூக் பெர்னாண்டஸ் சாடியுள்ளார்
