📢 உயர்வு மடானி மானியத் திட்டத்திற்கு அமோக வரவேற்பு; 5 நாட்களில் 1,340 விண்ணப்பங்கள்!

மலேசிய இந்திய உருமாற்றப் பிரிவு (மித்ரா) அறிமுகப்படுத்திய ‘உயர்வு மடானி’ மானியத் திட்டத்திற்கு இந்திய சமூகத்தினரிடையே பெரும் வரவேற்பு கிடைத்துள்ளது.

திட்டம் பொதுமக்களுக்கு அறிவிக்கப்பட்டு வெறும் ஐந்து நாட்களிலேயே, இன்று நண்பகல் 12 மணி நிலவரப்படி மொத்தம் 1,340 விண்ணப்பங்கள் பதிவாகியுள்ளதாக மித்ரா தெரிவித்துள்ளது.

மனிதவள அமைச்சர் டத்தோஸ்ரீ ரமணன் ராமகிருஷ்ணன் கடந்த ஜூன் 29ஆம் தேதி அதிகாரப்பூர்வமாக தொடங்கி வைத்த இந்தத் திட்டத்தின் கீழ், தகுதியுள்ள இந்திய தொழில்முனைவோருக்கு அவர்களின் வணிக வகையைப் பொறுத்து அதிகபட்சமாக RM50,000 வரை மானியம் வழங்கப்படுகிறது.

மித்ரா தலைமை இயக்குநர் என். ரவீந்திரன் நாயர் கூறுகையில், இந்த விண்ணப்பங்களின் எண்ணிக்கை, குறு மற்றும் சிறு தொழில்முனைவோர்கள் தங்கள் வணிகத்தை விரிவுபடுத்த நிதி ஆதரவை பெரிதும் எதிர்பார்த்து வருவதை வெளிப்படுத்துகிறது என்றார்.

விண்ணப்பங்கள் 2026 ஜூலை 13 வரை ஏற்கப்படும் என அறிவிக்கப்பட்டிருந்தாலும், நிர்ணயிக்கப்பட்ட 1,500 விண்ணப்பங்கள் என்ற உச்சவரம்பு அதற்கு முன்னரே எட்டப்பட்டால், விண்ணப்பப் பதிவு காலம் முன்கூட்டியே நிறுத்தப்படலாம் என்றும் அவர் தெரிவித்தார்.

இந்தத் திட்டத்தின் கீழ், தகுதி அடிப்படையில் 700 இந்திய தொழில்முனைவோர்கள் தேர்வு செய்யப்பட்டு, அவர்களுக்கு மானிய நிதியுதவி வழங்கப்படவுள்ளது.