ஜொகூர் மாநில சட்டமன்றத் தேர்தலை முன்னிட்டு மேற்கொள்ளப்பட்டுள்ள பல்வேறு கருத்துக்கணிப்புகளின் அடிப்படையில், பக்கத்தான் ஹரப்பான் கூட்டணி கணிசமான வெற்றியைப் பதிவு செய்யும் வாய்ப்பு அதிகரித்துள்ளதாக பிகேஆர் மத்திய தலைமைக் குழு உறுப்பினரும், செந்தோசா சட்டமன்ற உறுப்பினருமான டாக்டர் குணராஜ் ஜார்ஜ் தெரிவித்துள்ளார்.
அவர் வெளியிட்டுள்ள அறிக்கையில், தேர்தல் களத்தில் மக்களிடையே ஏற்பட்டுள்ள வரவேற்பு, பிரச்சாரக் கூட்டங்களில் காணப்படும் உற்சாகம் மற்றும் பல்வேறு சுயாதீன கருத்துக்கணிப்புகளின் முடிவுகள் அனைத்தும் பக்கத்தான் ஹரப்பானுக்கு சாதகமான சூழலை உருவாக்கியுள்ளதாகக் குறிப்பிட்டார்.
“மக்கள் தற்போது வெறும் வாக்குறுதிகளை அல்ல, செயல்திறனையும் சாதனைகளையும் மதிப்பீடு செய்து முடிவெடுக்கத் தொடங்கியுள்ளனர். அதனால் கருத்துக்கணிப்புகளிலும் பக்கத்தான் ஹரப்பானுக்கு குறிப்பிடத்தக்க ஆதரவு இருப்பது தெளிவாக தெரிகிறது,” என்றார்.
பிரதமர் டத்தோஸ்ரீ அன்வார் இப்ராஹிம் தலைமையிலான மடானி அரசாங்கம் கடந்த காலத்தில் செயல்படுத்திய மக்கள் நலத் திட்டங்கள், பொருளாதார சீர்திருத்தங்கள், கல்வி, சமூக நலன் மற்றும் இந்திய சமூகத்திற்கு வழங்கப்பட்ட பல்வேறு உதவித் திட்டங்கள் ஆகியவை மக்களிடையே நல்ல வரவேற்பைப் பெற்றுள்ளதாகவும் அவர் கூறினார்.
குறிப்பாக, இளைஞர்கள், முதல் முறையாக வாக்களிப்பவர்கள் மற்றும் நகர்ப்புற வாக்காளர்கள் மத்தியில் பக்கத்தான் ஹரப்பானுக்கு ஆதரவு அதிகரித்து வருவதாகவும் அவர் தெரிவித்தார்.
இந்நிலையில், தேர்தல் நாளன்று அனைத்து ஆதரவாளர்களும் தவறாமல் வாக்களிக்க வேண்டும் என்றும், அதிக வாக்காளர் பங்கேற்பே தேர்தல் முடிவை தீர்மானிக்கும் முக்கிய காரணியாக இருக்கும் என்றும் டாக்டர் குணராஜ் வலியுறுத்தினார்.
“கருத்துக்கணிப்புகள் சாதகமாக இருந்தாலும், இறுதி முடிவை தீர்மானிப்பது வாக்காளர்கள்தான். எனவே, ஒவ்வொருவரும் தங்களது ஜனநாயகக் கடமையை நிறைவேற்றி வாக்களிக்க வேண்டும். மக்கள் நம்பிக்கை அளித்தால், ஜொகூரில் நிலையான, முன்னேற்றமான மற்றும் அனைவரையும் உள்ளடக்கிய ஆட்சியை பக்கத்தான் ஹரப்பான் வழங்கும்,” என்று டாக்டர் குணராஜ் ஜார்ஜ் தெரிவித்தார்.
