நாட்டின் முக்கியத் துறைகளில் நிலவும் கடுமையான தொழிலாளர் பற்றாக்குறையைச் சமாளிக்கும் வகையில், 15,000 வெளிநாட்டுத் தொழிலாளர்களுக்கான விண்ணப்பங்களை உடனடியாகப் பரிசீலித்து, செயல்முறைகளைத் துரிதப்படுத்துமாறு மனிதவள அமைச்சகத்திற்கு பிரதமர் டத்தோஸ்ரீ அன்வார் இப்ராஹிம் உத்தரவிட்டுள்ளார்.
வெளிநாட்டுத் தொழிலாளர் ஆட்சேர்ப்பு தொடர்பாக தற்போது நிலவும் பிரச்சினைகள் குறித்து அமைச்சரவைக் கூட்டத்தில் விரிவாக விவாதிக்கப்பட்டதாக தொடர்பு அமைச்சர் டத்தோஸ்ரீ ஃபஹ்மி ஃபட்ஸில் தெரிவித்தார்.
தொழிலாளர் பற்றாக்குறையால் கடுமையாகப் பாதிக்கப்பட்டுள்ள துறைகளின் உடனடித் தேவைகளைப் பூர்த்தி செய்வதுடன், நாட்டின் பொருளாதார நடவடிக்கைகள் தடையின்றி தொடர்வதை உறுதி செய்யும் நோக்கில், முதற்கட்டமாக இந்த 15,000 விண்ணப்பங்கள் மீது உடனடி நடவடிக்கை எடுக்க பிரதமர் கேட்டுக்கொண்டுள்ளதாக அவர் கூறினார்.
குறிப்பாக, தொழிலாளர் பற்றாக்குறை காரணமாக உற்பத்தி மற்றும் சேவை நடவடிக்கைகள் பாதிக்கப்படுவதைத் தவிர்க்க, தேவையான துறைகளுக்கு வெளிநாட்டுத் தொழிலாளர்களை விரைவாகக் கொண்டுவருவதற்கான செயல்முறைகள் துரிதப்படுத்தப்படவுள்ளன.
முன்னதாக, கடந்த ஜூலை 1ஆம் தேதி அமைச்சரவை எடுத்த முடிவைத் தொடர்ந்து, வெளிநாட்டுத் தொழிலாளர் ஒதுக்கீட்டை நிர்வகிக்கும் முழுப் பொறுப்பையும் மனிதவள அமைச்சகம் ஏற்றுக்கொண்டதாக மனிதவள அமைச்சர் டத்தோஸ்ரீ ஆர். ரமணன் ஜூலை 6ஆம் தேதி அறிவித்திருந்தார்.
இதன் தொடர்ச்சியாகவே, தற்போது 15,000 வெளிநாட்டுத் தொழிலாளர் விண்ணப்பங்களுக்கு முன்னுரிமை அளித்து நடவடிக்கைகளை விரைவுபடுத்த பிரதமர் உத்தரவிட்டுள்ளார்.
