புத்ராஜயா பெர்டானா பெர்ஹாட் (Putrajaya Perdana Berhad) நிறுவனம் ஜோ லோவின் கட்டுப்பாட்டில் இருந்ததாகக் கூறப்படும் காலகட்டத்திலேயே, அந்நிறுவனத்தின் பங்குகளை வாங்குவதற்கான ஒப்புதல் வழங்கப்பட்டதாக இரண்டாவது நிதியமைச்சர் டத்தோஸ்ரீ அமீர் ஹம்சா அசிசான் தெரிவித்துள்ளார்.
கடந்த 2014ஆம் ஆண்டு, புத்ராஜயா பெர்டானா பெர்ஹாட் நிறுவனத்தின் 30 சதவீதப் பங்குகளை தாபோங் ஹாஜி வாரியம் வாங்குவதற்கான முழுமையான ஒப்புதல் செயல்முறை மேற்கொள்ளப்பட்டதாக அவர் கூறினார்.
அந்தக் காலகட்டத்தில் புத்ராஜயா பெர்டானா நிறுவனம் UPG Berhad மூலம் ஜோ லோவின் கட்டுப்பாட்டில் இருந்ததாகக் கூறப்படுகிறது என்றும் அவர் குறிப்பிட்டார்.
SRC International வழக்கில் பதிவு செய்யப்பட்ட சத்திய வாக்குமூலங்களில் இடம்பெற்ற தகவல்களின் அடிப்படையில் இந்த விவரங்கள் முன்வைக்கப்பட்டதாக அமீர் ஹம்சா தெரிவித்தார்.
புத்ராஜயா பெர்டானா பெர்ஹாட் நிறுவனத்தின் இயக்குநர் டத்தோ ரோஸ்மான் அப்துல்லா வழங்கிய பிரமாண வாக்குமூலத்தின்படி, SRC International நிறுவனம் 2014 ஜூலை முதல் ஆகஸ்ட் வரையிலான காலப்பகுதியில் மூன்று கட்டங்களாக RM170 மில்லியனை, புத்ராஜயா பெர்டானாவின் துணை நிறுவனமான Putra Perdana நிறுவனத்திற்கு வழங்கியதாகத் தெரிவிக்கப்பட்டுள்ளது.
தாபோங் ஹாஜி தொடர்பான அரச விசாரணை ஆணையத்தின் அறிக்கை குறித்து மக்களவையில் நடைபெற்ற சிறப்பு விவாதத்தின் நிறைவு அமர்வின்போது அமீர் ஹம்சா இந்தத் தகவல்களை வெளியிட்டார்.
பிரதமர் துறை (மத விவகாரங்கள்) அமைச்சர் டாக்டர் சூல்கிஃப்லி ஹசன் முன்னிலையில் நடைபெற்ற அந்த அமர்வில், தாபோங் ஹாஜி தொடர்பான விவகாரங்கள் மற்றும் முதலீட்டு முடிவுகள் குறித்தும் விளக்கங்கள் அளிக்கப்பட்டன.
