பண்டார் உத்தமாவில் கடந்த ஆண்டு நடந்த பள்ளி மாணவி கொலை வழக்கில், 15 வயது சிறுவன் மீதான குற்றச்சாட்டு நீக்கப்பட்டு விடுவிக்கப்பட்ட ஷா ஆலம் உயர்நீதிமன்ற தீர்ப்புக்கு எதிராக சட்டத்துறைத் தலைமை அலுவலகம் (AGC) மேல்முறையீடு செய்துள்ளது.
இன்று வெளியிட்ட அறிக்கையில், செப்டம்பர் 14-ஆம் தேதி வழங்கப்பட்ட உயர்நீதிமன்றத் தீர்ப்புக்கு எதிராக, செவ்வாய்க்கிழமை மேல்முறையீட்டு நீதிமன்றத்தில் மேல்முறையீட்டு அறிவிப்பை தாக்கல் செய்ததாக AGC தெரிவித்துள்ளது.
வழக்கின் பின்னணி: தண்டனைச் சட்டத்தின் பிரிவு 302-ன் கீழ் கொலைக் குற்றச்சாட்டு சுமத்தப்பட்டிருந்த இந்த சிறுவன் மீதான வழக்கு, கடந்த ஆண்டு அக்டோபர் 14-ஆம் தேதி காலை 9.20 முதல் 9.35 மணி வரையிலான நேரத்தில், பள்ளியின் பெண்கள் கழிவறையில் 16 வயது யாப் ஷிங் ஸுவெனை குத்திக் கொன்றதாகக் கூறப்பட்டது.
நீதிமன்றத் தீர்ப்பு என்ன? வாதத் தரப்பு விவாதங்கள் நிறைவடைந்த நிலையில், குற்றம் நடந்த போது சிறுவன் மனநிலை பாதிக்கப்பட்டிருந்தான் என நீதிபதி Adlin Abdul Majid கண்டறிந்து, அவரை விடுவித்தார். எனினும், அவரை பேராக்கின் ஹோஸ்பிட்டல் பஹாகியா உலு கின்டாவில் சிகிச்சைக்காக தங்கவைத்து, செலாங்கூர் சுல்தானின் விருப்பப்படி தடுப்புக் காவலில் வைக்குமாறு நீதிபதி உத்தரவிட்டார்.
பாதிக்கப்பட்டவரின் தாயார் என்ன கூறுகிறார்? விடுதலைத் தீர்ப்பைத் தொடர்ந்து, ஷிங் ஸுவெனின் தாயார் வோங் லீ பிங், AGC தீர்ப்புக்கு எதிராக மேல்முறையீடு செய்ய வேண்டும் எனக் கோரி பொதுமக்களிடம் ஒரு மனுவை ஆதரிக்குமாறு வேண்டுகோள் விடுத்திருந்தார்.
