📊 டேலண்ட் கார்ப் புதிய தலைமைச் செயல் அதிகாரியாக பிருந்தா மூர்த்தி நியமனம்!

மலேசியாவின் திறனாளர் மேம்பாட்டுத் திட்டங்களை அடுத்த கட்டத்திற்கு கொண்டு செல்லும் முக்கிய முயற்சியாக, மலேசியத் திறனாளர் கழகம் (TalentCorp) புதிய தலைமைச் செயல் அதிகாரியாக பிருந்தா மூர்த்தி நியமிக்கப்பட்டுள்ளார்.

இந்த நியமனக் கடிதத்தை, மனிதவள அமைச்சர் டத்தோஸ்ரீ ரமணன் ராமகிருஷ்ணன் இன்று நேரில் வழங்கியுள்ளார். இந்த நியமனம் இன்று முதல் அதிகாரப்பூர்வமாக அமலுக்கு வந்துள்ளது.

இது தொடர்பாக அமைச்சர் கூறுகையில்,
“நவீன தொழில்துறை தேவைகளுக்கு ஏற்ப நாட்டின் மனிதவள திறன்களை மேம்படுத்தும் நோக்கில் இந்த நியமனம் சரியான முடிவாகும்,” என்றார்.

அரசாங்கம், கல்வி மற்றும் தொழில்துறை துறைகளில் 20 ஆண்டுகளுக்கும் மேலான அனுபவம் கொண்ட பிருந்தா, TalentCorp நிறுவனத்தை சிறப்பாக வழிநடத்துவார் என அமைச்சர் நம்பிக்கை தெரிவித்துள்ளார்.

மேலும், புதிய கண்டுபிடிப்புகளை ஊக்குவிப்பதும், தொழில்துறைக்கு தேவையான திறமையான பணியாளர்களை உருவாக்குவதிலும் பிருந்தாவின் அனுபவம் நாட்டிற்கு பெரும் பலனாக இருக்கும் என்றும் அவர் குறிப்பிட்டார்.

“சவாலான பொருளாதார சூழ்நிலையில், அவருடைய தலைமைத்துவம் மிகவும் அவசியமானது. TalentCorp நிறுவனத்தின் மூலம் வேலைவாய்ப்பு சந்தையை வலுப்படுத்தி, மலேசியர்களுக்கு தரமான வேலைவாய்ப்புகளை உருவாக்கும் பணியில் அவர் முக்கிய பங்கு வகிப்பார்,” என்றும் அமைச்சர் தெரிவித்தார்.

அதேவேளை, முன்னாள் தலைமைச் செயல் அதிகாரி எட்வர்ட் லிங் ஆற்றிய பணிகளுக்காக அமைச்சர் தனது நன்றியை தெரிவித்தார்.

புதிய பொறுப்பை ஏற்றுள்ள பிருந்தா மூர்த்தி, தனது பணியில் சிறந்து விளங்கி நாட்டின் முன்னேற்றத்திற்கு முக்கிய பங்களிப்பு வழங்குவார் என அனைவரும் எதிர்பார்க்கின்றனர்.