பல ஆண்டுகளாக இந்திய சமூகத்திற்கு பல்வேறு வாக்குறுதிகள் வழங்கப்பட்டு வந்தாலும், அவற்றை முறையாகச் செயல்படுத்துவதில்தான் முக்கியப் பிரச்சினை உள்ளது என்று பெர்சமா கட்சியின் தலைவர் ரபிசி ரம்லி தெரிவித்துள்ளார்.
இந்திய சமூகத்தைப் பிரதிநிதித்துவப்படுத்தும் 19 அரசு சாரா அமைப்புகள் (NGO) முன்வைத்த கோரிக்கைகள் மற்றும் பரிந்துரைகளை தாம் கவனத்தில் எடுத்துள்ளதாக அவர் கூறினார்.
பெர்சமா கட்சியின் கொள்கை அறிக்கையைத் தயாரிக்கும் போது இந்த முன்மொழிவுகள் பரிசீலிக்கப்படும் என்றும், அவை பின்னர் கட்சியின் தேர்தல் அறிக்கையை உருவாக்குவதற்கான அடிப்படையாக அமையும் என்றும் ரபிசி தெரிவித்தார்.
இதுதொடர்பாக மற்ற சமூகக் குழுக்களுடனும் கட்சி கலந்தாலோசனைகளை மேற்கொள்ளும். அத்துடன், Kelombang Saksama தரப்புடனும் மேலதிக கலந்துரையாடல்கள் நடத்தப்படும் என்று அவர் கூறினார்.
இந்திய சமூகத்தின் நலன் தொடர்பாக கடந்த பல ஆண்டுகளாக ஏராளமான வாக்குறுதிகள் வழங்கப்பட்டுள்ளதைச் சுட்டிக்காட்டிய ரபிசி, வாக்குறுதிகளை அறிவிப்பதைவிட அவை மக்களிடம் சென்றடையும் வகையில் செயல்படுத்தப்படுவதை உறுதி செய்வதே முக்கியம் என்றார்.
பொதுவான சமூக மற்றும் பொருளாதாரப் பிரச்சினைகளுக்குத் தீர்வு காணப்பட்டாலும், சில குறிப்பிட்ட தரப்பினருக்குத் தனிப்பட்ட கவனம் தொடர்ந்து தேவைப்படும் என்றும் அவர் தெரிவித்தார்.
“ஒவ்வொரு குழுவும் எதிர்கொள்ளும் பிரச்சினைகளும் அவற்றுக்கான சூழ்நிலைகளும் வேறுபட்டவை. எனவே, அனைவருக்கும் ஒரே அணுகுமுறையைப் பயன்படுத்துவதற்குப் பதிலாக, அவர்களின் தேவைகளுக்கு ஏற்ப தீர்வுகள் உருவாக்கப்பட வேண்டும்,” என்று ரபிசி கூறினார்.
இந்திய சமூகத்தின் கோரிக்கைகளை கட்சியின் எதிர்கால கொள்கை மற்றும் தேர்தல் திட்டங்களில் எவ்வாறு இணைக்க முடியும் என்பது குறித்து தொடர்ந்து ஆலோசிக்கப்படும் என்றும் அவர் தெரிவித்தார்.
