🌸 “தமிழ் வழி ஆன்மீகம்” – பெட்டாலிங் ஜெயா மாரியம்மன் ஆலய குடமுழுக்கு விழாவில் புதிய அத்தியாயம்!

மலேசிய திருநாட்டின் பெட்டாலிங் ஜெயா எஸ்.எஸ்.1 அருள் மிகு மாரியம்மன் ஆலயத்தின் குடமுழுக்கு விழா முழுக்க தமிழில் நடைபெற்றது, இது புதிய வரலாறாகக் குறிப்பிடப்படுகிறது.

கோவை பேரூர் ஆதீனம் 25ஆம் பட்டம் குருமகா சந்நிதானம் முனைவர் திருப்பெருந்திரு சாந்தலிங்க மருதாசல அடிகளார் தலைமையில் இந்த விழா கோலாகலமாக நடந்தது. குறுகிய கால பயணமாக மலேசியா வந்த அடிகளார், இன்று காலை குயில் ஜெயபக்தி நிறுவனத்திற்கும் வருகை புரிந்தார். நிறுவன உரிமையாளர் டத்தோ டாக்டர் கு. செல்வராஜ் அவரை அன்புடன் வரவேற்றார்.

பேரூர் மடம் தமிழ்நாட்டின் பழமையான சைவ ஆதீனங்களில் ஒன்றாகும். கோவில்களைப் புதுப்பித்தல், மருத்துவமனை கட்டிடம், சமூக சேவை போன்ற பல பணிகளை மேற்கொண்டு வருகிறது. தமிழக முன்னாள் முதல்வர் மு. கருணாநிதி முதல் இன்றைய முதல்வர் மு.க. ஸ்டாலின் வரை பேரூர் மடம் தமிழக அரசுடன் நெருங்கிய உறவை பேணி வருகிறது.

“ஆலயங்களில் தமிழில் குடமுழுக்கு விழா நடைபெறுவது எங்களுக்கு பெருமை. எதிர்காலத்தில் மேலும் அதிக அளவில் தமிழில் நிகழும் என்ற நம்பிக்கை உள்ளது. அடுத்த ஆண்டு பேராக் ஜெயா பாக்கில் நடராஜா பெருமான் ஆலய குடமுழுக்கிலும் நாங்கள் கலந்துகொள்வோம்” என அடிகளார் வலியுறுத்தினார்.