🍲 “உணவு விநியோக பணியாளர் மீது சூடான சூப் வீச்சு!” – FamilyMart ஊழியர் பணி இடைநீக்கம்

உணவு விநியோக பணியாளர் ஒருவரின் மீது சூடான சூப்பை வீசி எறிந்ததாகக் கூறப்படும் சம்பவத்தைத் தொடர்ந்து, FamilyMart நிறுவனம் சம்பந்தப்பட்ட பெண் ஊழியரை உடனடியாகப் பணி இடைநீக்கம் செய்து உள்விசாரணையைத் தொடங்கியுள்ளது.

கோத்தா டாமான்சாராவில் உள்ள The Core வளாகத்தில் இந்தச் சம்பவம் நடைபெற்றதாக தெரிவிக்கப்பட்டுள்ளது.

சமூக ஊடகங்களில் வைரலான காணொளியில், உணவு விநியோக பணியாளருக்கும் பெண் ஊழியருக்கும் இடையே ஏற்பட்ட வாக்குவாதத்தின் போது, ஆத்திரமடைந்த ஊழியர் சூடான சூப்பை வீசி எறிவது பதிவாகியுள்ளது.

இந்தச் சம்பவம் பொதுமக்களிடையே கடும் அதிருப்தியையும் கவலையையும் ஏற்படுத்தியுள்ளது.

இதுகுறித்து அறிக்கை வெளியிட்டுள்ள FamilyMart நிர்வாகம், நடந்த சம்பவத்திற்கு வருத்தம் தெரிவித்ததுடன், எந்தவிதமான வன்முறை அல்லது ஒழுங்கீனமான நடத்தையையும் நிறுவனம் ஒருபோதும் ஏற்றுக்கொள்ளாது என்று வலியுறுத்தியுள்ளது.

மேலும், சம்பந்தப்பட்ட ஊழியர் தற்காலிகமாகப் பணி இடைநீக்கம் செய்யப்பட்டுள்ளதுடன், சம்பவம் தொடர்பாக முழுமையான உள்விசாரணை மேற்கொள்ளப்பட்டு வருவதாகவும் நிர்வாகம் தெரிவித்துள்ளது.

“எங்கள் வாடிக்கையாளர்கள், பணியாளர்கள் மற்றும் சேவை கூட்டாளிகளின் பாதுகாப்பும் மரியாதையும் எப்போதும் எங்களின் முன்னுரிமையாகும்,” என்று FamilyMart தனது அறிக்கையில் குறிப்பிட்டுள்ளது.