நாட்டின் சரவாக், சிலாங்கூர், கெடா மற்றும் பினாங்கு ஆகிய நான்கு மாநிலங்களில் காற்றுத் தரம் ஆரோக்கியமற்ற நிலையை எட்டியுள்ளது.
இன்று காலை 8 மணி நிலவரப்படி, மலேசிய காற்று மாசுபாட்டு குறியீட்டு முறையின் (APIMS) தரவுகளின் அடிப்படையில் இந்த நிலை பதிவாகியுள்ளது.
சரவாக் மாநிலத்தில் அதிகபட்சமாக ஐந்து பகுதிகள் ஆரோக்கியமற்ற காற்றுத் தரத்தால் பாதிக்கப்பட்டுள்ளன. அவற்றில் செரியான் மாவட்டக் காவல் தலைமையகப் பகுதியில் 188 என்ற மிக உயர்ந்த காற்றுத் தரக் குறியீடு பதிவாகியுள்ளது.
சிலாங்கூரில் ஜொஹான் செத்தியா பகுதியில் 161 என்ற அளவிலும், கோலா சிலாங்கூரில் 128 என்ற அளவிலும் காற்றுத் தரக் குறியீடு பதிவாகியுள்ளது.
கெடாவில் சுங்கை பட்டாணியில் 155 மற்றும் அலோர் செடாரில் 145 என்ற அளவில் காற்றுத் தரம் பதிவாகி, இரு பகுதிகளும் ஆரோக்கியமற்ற நிலையில் உள்ளன.
பினாங்கிலும் காற்றுத் தரக் குறியீடு 134 ஆகப் பதிவாகியுள்ளது.
இதற்கிடையில், நாடு முழுவதும் 58 பகுதிகளில் காற்றுத் தரம் மிதமான நிலையில் இருப்பதாகத் தெரிவிக்கப்பட்டுள்ளது. காற்றுத் தரக் குறியீட்டு விவரங்கள் ஒவ்வொரு மணி நேரமும் அதிகாரப்பூர்வமாகப் புதுப்பிக்கப்பட்டு வருகின்றன.
காற்றுத் தரக் குறியீட்டின்படி, 0 முதல் 50 வரை நல்ல நிலை, 51 முதல் 100 வரை மிதமான நிலை, 101 முதல் 200 வரை ஆரோக்கியமற்ற நிலை என வகைப்படுத்தப்படுகிறது.
பாதிக்கப்பட்ட பகுதிகளில் வசிக்கும் மக்கள், குறிப்பாக வெளிப்புற நடவடிக்கைகளில் ஈடுபடுவோர், காற்றுத் தரம் தொடர்பான அதிகாரப்பூர்வ அறிவிப்புகளைத் தொடர்ந்து கவனிக்குமாறு அறிவுறுத்தப்படுகின்றனர்.
