வவாசான் நெகாரா கட்சி புதிய அரசியல் கட்சியாக பதிவு செய்யப்படவில்லை என்றும், ஏற்கனவே இருந்த ஒரு கட்சியைப் பொறுப்பேற்று அதன் பெயரை மாற்றியதன் மூலமே தற்போதைய அமைப்பு உருவாக்கப்பட்டதாகவும் அதன் தலைவர் டத்தோஸ்ரீ ஹம்ஸா ஜைனுடின் விளக்கமளித்துள்ளார்.
பாஸ் தலைமையகத்தில் நடைபெற்ற எதிர்க்கட்சி நாடாளுமன்ற உறுப்பினர்களின் கூட்டத்தில் கலந்து கொண்ட பின்னர் செய்தியாளர்களிடம் பேசிய அவர், வவாசான் நெகாரா கட்சியின் பதிவு நிலை தொடர்பாக எழுப்பப்பட்ட கேள்விக்கு பதிலளித்தார். “நான் ஏற்கனவே இருந்த ஒரு கட்சியைப் பொறுப்பேற்றேன். அதன் பின்னர் அதன் பெயரை மாற்றினோம்,” என்று அவர் சுருக்கமாகக் கூறினார்.
ரீசெட் இயக்கத்தின் நிறுவனருமான ஹம்ஸா, தற்போதைய அரசியல் சூழலில் கட்சியின் பதிவு அல்லது அமைப்பு தொடர்பான விடயங்களைக் காட்டிலும், வரவிருக்கும் தேர்தல்களுக்கான தயாரிப்புகளே முக்கிய கவனமாக இருப்பதாக தெரிவித்தார். எதிர்க்கட்சிகளின் ஒத்துழைப்பு மற்றும் தேர்தல் உத்திகள் குறித்து கூட்டத்தில் விரிவாக விவாதிக்கப்பட்டதாகவும் அவர் குறிப்பிட்டார்.
மேலும், இன்றைய சந்திப்பின் முக்கிய நோக்கம் கட்சிகளுக்கிடையேயான நிர்வாக விவகாரங்கள் அல்ல என்றும், எதிர்வரும் தேர்தல்களில் மக்களின் ஆதரவைப் பெறுவதற்கான திட்டங்கள், தயாரிப்புகள் மற்றும் கூட்டணியின் அடுத்தகட்ட நடவடிக்கைகள் குறித்த ஆலோசனைகளிலேயே கவனம் செலுத்தப்பட்டதாக ஹம்ஸா ஜைனுடின் தெரிவித்தார்.
